Para saber das mestras

De escolas patas arriba
Non entendes unha palabra

Non ten por que pintar flores de cores nos cristais cando comeza o curso, pero encántalle facelo. Ninguén a obriga a debuxar monifates para adornar as mesas e tampouco lle esixen decorar de imaxinación as catro paredes desvestidas en setembro. Pero non só non lle importa, adora esa tarefa.

Na casa, quítalle tempo ao seu lecer persoal mentres recorta e plastifica figuras de personaxes para usar na aula ao día seguinte. Cavila músicas e coreografía para unha non imprescindible función de Nadal cos meniños. O guión non o esixe pero, ademais de facer fichas e cumprir obxectivos dun programa, senta os cativos unha tarde calquera para relatarlles algún conto e falarlles de libros e músicas fascinantes. Ás veces compra pola súa conta material que o sistema non lle proporciona.

Inventa minutos onde non os hai para elaborar ideas coas que combater a fatiga dos pícaros e espertar o seu devezo por aprender un día si e outro tamén. E non é o seu traballo, pero non evita soar mocos, limpar cus, axudar a lavar mans, curar feridas ou enxugar bágoas. Xestiona berrinches de pequechos descontrolados que algunhas familias finxen non ter tempo para ensinar a non ser caprichudos.

Multiplicouse moitas mañás para vixiar que algún neno non quedase atrás nun curso con demasiados rapaces por aula. Peteirou algún xantar improvisado sobre a mesa da clase mentres argallaba algunha actividade novidosa. Quedou durmida de cansazo algunha tarde na propia aula despois doutra xornada extenuante espremendo as horas no desafío dun novo día de ensinanzas e aprendizaxes. Superheroe? Non. Unha mestra, como moitos mestres.

Non sempre un pai lle agradece o que fai por seu fillo. Non todos os días unha nai lle regala unha plantiña. Da man de súa neta un avó tráelle unha rosa da súa horta. Un alumno dille que hoxe, tamén, está moi guapa. Pequenos detalles impagábeis do cotiá a pé dun aula. Ás veces acontecen.

Hai anos falábase máis de dignificar o labor docente: tratalos coa deferencia que merecen. Agora recórtanlles soldo, insinúanlles que teñen demasiadas vacacións e esíxenlles xornadas máis longas. É isto froito da ignorancia ou da indiferenza? Se a autoestima dun país se mide polo grao de atención, recursos, consideración e interese que a súa sociedade ten respecto da educación, asomámonos a un preocupante precipicio de apatía. Di un proverbio africano: “Para educar un cativo cómpre a tribo enteira”. Pois aquí cómpre que a tribo esperte.

Roberto Noguerol

vacacións, pero as mestras aínda no cole.

Bo verán para todos e para todas. Ler, escribir, pero por favor xogar e gozar da praia, do monte e da natureza.

Festa rachada

Alumnado e Profesorado afirman que foi unha das mellores festas: bailes, xogos de auga, paracaídas e outros xogos.
Rompendo as barreiras. Convivimos nuns espazos e nuns tempos grupos heteroxeneos formados por distintas idades. Amosamos unhas imaxes da ledicia que sentimos. Jo, que ben en bañador no cole. Esto é increíble.

Os cumpleanos de xuño

ANTÍA, UXÍA E ZAIRA.

Fin de curso

Estamos todos e todas moi cansos/as. Aínda que as familias pensen que o alumnado non curra, non é verdade. Son cinco horas de traballo diario, case como un adulto. O máis agradable é que sentímonos todos moi acompañados.
As mestras Rosana e Susi desexan que pasedes un bo verán e que veñamos todos coas pilas cargadas para iniciar un novo curso.